【客語詩】油桐花——懷念 Hakka 阿姆

(2014年10月30日)

本新聞提供者: 教會公報 ◎賴德卿 油桐花，熱情个、　自家完全獻出了 打拚出來，像白雪樣仔个水沖，分人讚嘆，盡靚 ! 妳个籽油，膏過美濃个遮仔 搖曳著幾多風情，呵護老嫩大細大家 毋驚旱毋驚瘠，妳遽遽仔長大，繁茂又挺拔 帶來一季个驚豔，呼喚台灣島南來北往遊賞个人 油桐花；在立夏个時節 一蕊一蕊綻放，恁樣打眼 毫不保留个、牽手結伴、綿延成海 花瓣像賁賁个心意，妳个油脂、妳个骨頭 全心全意，以圓身作祭，歸身屬於── 屬於愛妳个人 愛像海浪啊，回想往擺，行嫁到 Hakka 屋下 新婦凝神於家庭，長年透天為愛操勞，愛到老 妳喲 Hakka 阿姆，以堅強有力个雙手，擎起天啊 油桐花──就係花期過了，跌落到地泥，　完完整整，無有一片殘破 阿姆──恁樣綺麗　恁樣正正 妳係旦旦孕育　个成長，親愛个 Hakka 阿姆 ! 妳對後生到老，省儉堅耐、當忠守著家園 毋盼得妳老喲 ! 　祈禱妳康健喲 ! 逐擺想到妳，1000蕊油桐花就在目珠頂慢慢飄落 香氣恬恬仔傳來…… 可愛風情个油桐花啊，夢中美麗个家鄉 親愛个 Hakka 阿姆喲，願妳平安 ! 愛妳永遠在心肝頭 !

本文 (及相關圖片) 由台灣教會公報新聞網授權提供。

台灣聖經網 www.TaiwanBible.com