【那 teh 褪色 e台灣俗語話】缺磁耐磕 (2014年10月30日)
◎李南衡
台語講「磁仔」（hui-a），無法度知影是講華語 e「瓷器」抑是「陶器」。華語 e「瓷器」咱台語叫作「幼磁」、華語 e 「陶器」咱台語講作「粗磁」。若是干單講「磁仔」是指幼磁 kah 粗磁 e 統稱。
咱台灣一般家庭食飯所使用 e 大細 e 碗盤湯匙碟仔 phiat 仔大部分是幼磁。早前 e 人真勤儉，有 e 碗盤有小可缺角抑是有 pit 痕，mā m̄ 甘拍掉 hiat-ka̍k，留 leh 罔用。有人特別注意，小可有缺角抑是有 pit 痕 e 磁仔，可能用兩冬三年猶 koh 好好 teh 用，新買來用無偌久 e 碗盤顛倒 bē 堪得小磕一下 tio̍h 破去，所以 tō 有人會搖頭講：「缺磁耐磕。（khi-hui nāi kha̍p.）」
Chit 句話 khah 捷提來講人。隔壁林家阿嬤，真早以前 tio̍h 聽講伊身體無勇健，bat 聽講伊胃潰瘍嚴重 kah 放血，in sim 婦一工 kā 洗幾領血褲，入院一禮拜外才出院；mā bat 聽講伊心臟手術，講是心臟幾條血筋塞 tiau leh、tio̍h 割腳 e 血筋去接，一禮拜外人出院了，mā 誠好勢 e 款式；若是講 khuh-khuh 嗽，林家阿嬤那像自少年時代嗽到 taⁿ，聽講看過大細間公私立病院，囝仔序細驚伊染 tio̍h 肺結核專工 chhōa 伊去防癆協會檢查，驗血、驗痰、照電光，舞歸晡猶原查無原因，路尾醫生 kā 講：「阿嬤，你 chit 號嗽 bē 好。」害阿嬤煩惱幾若工：「嗽 bē 好 beh 按怎？」m̄ 免按怎，林阿嬤藥仔 m̄ -bat 斷，人伊講明年 beh 作九十歲大生日。
另外一個故事，生理作誠大、六十九歲 e 金龍金老 pan，人親像伊 e 名、一尾那龍咧、身體勇 khian-khian，m̄ -bat 聽講伊按怎。頂個月，tī 公司上班上一半、kha 電話 kā in 某講伊胸坎塞塞、人真艱苦，公司 e 司機會載伊去台大病院急診，叫 in 某緊去台大病院急診室 chhōe 伊。金老 pan 住院成十工 tō 去 ah。無人敢問董娘仔到底金老 pan tio̍h 啥病。干單聽伊一直怨歎講：六十九 lah，歹狗過 bē 過 lah，伊一生健保卡用頭一擺、mā 用上尾擺！厝邊頭尾忽然間才想起藥仔 lang 時無 lang 日 e 林阿嬤，講伊是「缺磁耐磕」。
今仔日台灣衛生觀念誠普遍，知影碗盤若有缺角抑是 pit 痕，m̄ -thang koh 繼續 the̍h 來使用，因為缺角抑是 pit 痕 e 所在，khah 會 tiau 細菌。大部分 e 人攏 bē koh 因為勤儉勉強使用有缺角抑是 pit 痕 e 碗盤。問少年 e 一代，in 完全 m̄ 知啥物是「缺磁」；我問阮教會八十歲以上 e 長輩，in 攏 bat 聽過 mā會曉講 chit 句台灣俗語話；若是問阮七十歲 chit ian e 兄姊差不多一半一半，五六十歲以下 e 攏無人 bat 聽過。Khah 奇怪 e 是查遍台灣俗語話 e 冊，攏無收 chit 句。相信 m̄ 免偌久，「缺磁耐磕」chit 句台灣俗語話會 tī 台灣消失去。
| ←前一篇 | 下一篇→ |